Ia ompunta Tuan Ampir adong
do sada pinomparna nahasaktian jala datu najogi. Tarbarita do hadatuonna dohot
hagogoon na nang jogina. Songon on ma hatoranganna: partonding. Ia amang ni na gabe Batu on: ima Ompunta Tuan
Ampir anak ni Datu Parulas Parultop. Ia na gabe batu on tolu do
nasida sabutuha:
1. Op. Raja
Suasa Mahulae
2. Op.
Tingkian Mahulae
3. Op.
Nagabe Batu Mahulae
Jala ama ni natolu on ima songon naung ginoaran di ginjang i ma tuan
Ampir tubu ni Datu Parulas Parultop paitolu ma ibana. Ia partubu ni na gabe batu
on songon na asing do partubu na sian donganna najolo, ia Na Gabe Batu on tubu
ni namborunta do on, ima boru ni Ompunta Panuju (Tuan Ampir) Mahulae. Dilaon-laon
ni ari disuru Ompunta ma ibana mardengke tu aek margagan ima na tingkan dolok
huta batu (tutoru ni dolok huta batu), huta ni si Raja Tunggal (huta ni
Sihotang Hasugian) tingki lao nasida marhuta sada tusi maningkir si Raja
Tunggal. Lao ma namborunta on tu aek margagan on maridi laos mandurung ma ibana
disi. Tingki namandurungi ibana ndang adong dapot ibana dengke i alai ianggo
bunga-bunga sai ro tu durungnai jadi dung ro tudurungna i diambukkon tu toruan.
Didurung muse alai ro tong bunga-bunga on tu durungna. Jadi sai marulak-ulak ma
bunga-bunga i tu durungna i nang pe sai diambungkon. Jadi ro ma boru Simarsoit on, “bunga-bunga
sai ro dengke so adong dapot”, ninna. Gabe dipangan ma bunga on laos mulak ma ibana tu huta laos
Dinasa hali ro ma udan mansai por situtu jala ronggurpe marlisilik-lisik
jadi disalip ronggur i ma na songon gundur i jadi dung disalip pintor ngoa-ngoa ma soara ni dak-danak oa-oa ima habegeon sian jabu hape
nabalutan do pas poso-poso on jadi dung dibege ao-oa dak danak do hape i do sinalip ni ronggur i gabe laos dialap
ma diboan tu jabu. Dung diboan tu jabu
huhut di borhos ma dibaen ma sanganon asa las. Rut-rutan golang-golang ullusan
pura-pura ma anakna on boi ma mardalan-dalan tu alaman jala marmeam-meam dohot
donganna dakdanak laos dibaen ma goarni anak na on na gabe batu, ala ni pangalahona
sai holan na panggoraon do jala tung jungkat do jala nang tuangka donganna
manang aha parenta ni natua sai dialodo ndang olo mangoloi poda ni natorasnai
nang pe dilissingi natorasna ndang diterge gabe marrara do dagingna i sude
nabalutan do ibana. Dung I godang-godang, asimun ma ibana ulluson pura-pura
balga ma ibana, alai lan balga ma nang pangalohona ai sai suhar-suhar ni poda
ni amana do alusna huhut panggoraon do sipata ndang marpantang hatana dohot
pangalahona nunga mansai jot-jot sai dohot amana dohot inana gabe hona toruan
dibaen ibana na sopatut diboto halak pe diboto ibana. Marbada pe ibana tu angka
donganna sai talu do dibaen manang ise nang pe guru dekkar manang beha pe ha
datuon ni halak dohot gogona sai dipatalu ibana do dalona i. Ia na gabe batu on
lam leleng mansai tamba do nabinotona dohot hatangkangonna, jadi alai sai tong
ma lam martamba-tamba pangaduon ni halak
dohot haboratan ala ni angka paraloanna laos so adong be hasonangan nasida alani pangalaho ni anakna
i. Jadi ala ni i ndang be tartaon nasida be pangalaho ni Na Gabe Batu on,
tarlobi mai ruhut ni angka adat-adat tu angka boru-boru ni halak na asing, gabe
tubu ma roha ni natorasna mamingkirhon tu inganan na asing sian dos ni raha
nasida. Gabe ditaruhon ma anakna on tu tombak ladang Tinjoan. Laos disi ma
ibana marlobu tarida dope lobu i sahat tu saonari. Tanda disi adong do disi
lobuna dohot sada ditinggalhon pisona/golok podang laos dohot dibatu di
Tinjoanni tarida do sahat tu tingki on. Dung i, dung di ida tongtong sai
marjahat dohot pangambatan ni angka pamolus sian ingananna i ai tardingkan
dalan do hape lobu ni Na Gabe Batu i asa manang ise mamolus sian i sai tong do diganggu. Ai molo adong angka
pamolus didia Na Gabe Batu I asa manang ise mamolus sai tong diganggu. Ai molo
adong angka pamolus diida Nagabe Batu
on, molo adong marhuta sada manigor dibuat do i jala diallangi, songon i ma
dohot na asing. Dung diida natorasna manang mangalu-alu angka dongan dipaboa,
ma pangalaho ni anakna i, gabe tubu ma rohani amanai naeng painsaton ibana sian
lobu nai. Tubu ma muse roha ni amana
dibagasan rohana paunsatonna ibana sia i.
Tagan disi ma ibana
maringanan adong ma halak Barus namargoar si Halende. Ai si Halende on, datu do
on jala nagogo do ibana jala na timbo. Ia si
Halende on pardalanan ni on sian Barus tu Tao Toba Samosir do
mangihuthon barita ni halak ala ni hadatuonna. Paridian ni si Halende on di
Barus do, ianggo parburionna di Tao Toba Samosir do laos disi ma ibana mangan
sansogot do didalani sian Barus sahat tu Tao Toba sai dibege-bege ma nagabe
batu do kabar-kabar ni si Halende on. Jadi sai naeng do jumpangan ibana dirohana
manang nabahe do tutu hajogionna dohot hadatuonna. Dinasahali dibereng/diida si
Halende ma pamantikan ni sada bulu
godang diponggol nagabe batu: dipussu ni bului do diponggol laos bingkas ma tu
ginjang punsu ni bulu i mansai timbo situtu: didok rohana dibagasan asa longang
si Halende naeng mamereng i. Disada
tingki di pardalanan ni si Halende on diida ma tutu pamantikan ni bulu i nunga
mansaitimbo longang ma tutu ibana mamereng pamantikan ni bulu I gabe didok
rohana ma dibagasan, “adong dope
nauntumimbo sian ahu ise ulaning i? alai ingkon hu jumpai ma ibana na nabeteng
nagogo manang datu natarbarita do ibana”. Jadi ala ni sai dilului ibana ma.
Jadi disada tingki pajumpang ma nasida disi umma dingkan toru ni
dolok I ma sada ladang ni Mogothualu/marga Buaton. Dung jumpang nasida, marbada
ma nasida disi diumpabai leleng do nasida marbadai gabe batu laos jala mapepe
angka rambai dipopo partinjuanna i. Talu ma si Halende dibaen Na Gabe Batu i
laos maporus ma ibanna sian inganan parbadaannai. Sahat tu tingki on ndang olo
tubu ramba di ingananan parbadaannai. Tarida do i sahat tu nuaeng.
Disada tingki, marpingkir ma
amana dohot donganna taringot tu pangalaho ni Na Gabe Batu on. Ala holan amana
do dihabiari manangnda disegani si Sorba, na gabe batu on. Molo manang ise
ndang hea ditangihon ibana. Hibul ma roha ni nasida mambahen sungkun-sungkun tu
anak na on. Manang tudia pe binaen maringan sai mangkorhon hasesega jala
mangkorhon hamagoan do dibaen ho pangalahom tu sude jolma na ni idam. Alani i
tudia do baenon? manang nanibunumuna asa mate ho? ninna. Jadi dialusi
nagabe batu ma songon on, “molo nunga
lomo rohamu mate ahu ba roham ma disi. Alai on tonangku tu hamu sai unang ma
olo hamu datu songon au on, jala unang ma hamu nagogo songon au on, jala unang
namalo songon au on”.
Jadi sude hata ni Na Gabe Batu
on dipangalohon ma asal ma mate ibana, dirohani amana dohot sude pamilina. Dung
songon i pangkataion nasida diboan ma ibana tu huluan ni sampuran Sipang, i ma sampuran Sibohong.
Maksud nasida disi asa laos madabu ibana tu toru ni sampuran Sibohong i. Dilonongkon
ma tutu ibana di aek i, alai danang lonong ibana gabe batu ma ibana disi. Jadi
dung batu ibana sonak ma manang tombak ma aek i sude. Binsatma aek i ndang
adong be mardalan aeki tu toruan gabe sonakma jala binsat-binsat aek i sahat tu huta Sipang. Jadi hinorhon ni
i gabe mumbang ma angka losung dihuta i jala marmatean angka pinahan dohot
angka manuk ala ni i. jadi dung songon i, gabe mabiar ma nasida. Mardatu ma
nasida martondung manang songon dia do baenon taringot tusi. Saut ma dibaen parmanuhon lao martondung. Jadi
didok datu i ma tu amani Na Gabe Batu i songon on, “ingkon margondang dalan jala ulos pangiring do manarat batu I asa bo”,
ninna. Alai umbaen na laos dipojong-pojong nasida batu ndang boi meret nanggo
humutik Na Gabe Batu I dibaen nasida.
Jadi dioloi nasida ma
parmanuhon ni datu i jala dibaen mai boi ma tutu diboan nasida ma batu on
di jampal-jampalan na donok tu huta i di
parpadangan. Dung diboan nasida disi asal adong mamolus pinahan manang horbo
dohot manuk mamintor mate do. Dung diida nasida songon i tong do hamamago hape
disi dibaen, gabe naeng ma pamunsatonna muse sian I alai ndang boi meret nanggo
humutik ndang boi. Jadi dung songon i gabe ditahi nasida ma muse songon si
parjolo i gondang dalan ma dipalu nasida ma Na Gabe Batu I gabe tu lambung
sampuran simpang, tungkan dolok ni simpang i. Laos dibaen nasida ma tungkan
toruanna i sada ruma parsantian/tungkup jala dibaen ma mualna disi. Dibaen
parsungean sada disi tungkan dolok-dolokna.
Dung dibaen nasida ma sada Pangulu Balang/Panglimana disi tungkan
dolok-dolokna. Dung dibaen Na Gabe Batu
disi/horas/hipas-hipas jala marpinompari ma turunan ni Tuan Ampir dohot dongan
sabutuhana sude. Sahat tu tingki naparpudi on sai dipature-ture do jala nuaeng laos dibangun
angka pomparanna do gabe dibaen ma diatas simin bidangna 2x3 meter, timbona
kira-kira 1 meter. Alai sahat tu sadarion ingkon pantun-pantun jala hohom do
manang ise ro naeng marnida Ompu Na Gabe Batu. Songon i ma sejarah Ompu Nagabe Batu.
NB : Molo adong
halobion hurang denggan hita manukkar
boi ditamba dohot dihurangi. Mauliaete
jala horas sian ahu.
Op. Selvia Mahulae
Yogyakarta, 24 Agustus
1985
0 komentar:
Posting Komentar