DEKLARASI HATA SATOLOP PUSUK-BUATON-MAHULAE (na sinurat ni Drs. Rensius Mahulae, SH)

PATIK JALA UHUM

Luhut Pinompar ni Datu Parulas Parultop Pusuk-Buaton-Mahulae sahata satolop manghatindangkon:

1.     Datu Parulas Parultop Sitombang tano jala Sisuan Bulu di Negeri Pusuk dohot na humalingna

Tano Negeri Negeri Pusuk dohot na humaliangna tangkas do i tano hinongkop sian angka musu, tombangan luat tetek ni mudar, tano tombangan ni ompunta Datu Parulas Parultop (DPP). Datu Parulas Parultop do Sitombang tano jala Sisuan Bulu di Negeri Pusuk dohot na humalingna.

2.     Tano dohot harajaaon di Negeri Pusuk dohot na humalingna,  pusako ni marga Pusuk-Buaton-Mahulae (PBM)

Tano dohot harajaaon di Negeri Pusuk dohot na humalingna, ima pusako sian Ompunta Datu Parulas Parultop (DPP) na diwarishon tu na tolu anakna ima marga Pusuk-Buaton-Mahulae (PBM).

3.     Hak Ripe-ripe Na So Jadi Pangompolan

Ripe-ripe do marga, harajaon, adat tarombo, pusako, arta, tano, dohot barang na diwarisson ni ompunta sijolo-jolo tubu; gabe patik jala uhum di hita luhut marga Pusuk-Buaton-Mahulae (PBM) di Negeri Pusuk dohot na humaliangna. Alani i, ripe-ripe ni Pusuk-Buaton-Mahulae (PBM) do tano dohot harajaon di Negeri Pusuk. Hak ripe-ripe i, tung na jadi pangompolan, ndang boi siahut turpuk jala sitodo lomo ni roha, pajolo gogo papudi uhum. Ingkon sisoring do uhum, siadapari gogo, tu sahata saoloan asa tubu hadameon, martua jala gabe di luhut pomparan ni Datu Parulas Parultop, Pusuk-Buaton-Mahulae.

Taringot tu arta pusako i di dok sijolo-jolo tubu do; Habang pe lali, ndang habang tungko; habang pe tungko, ndang habang tano. Lapatanna, lali boi do habang, anggo tungko ndang boi habang; tung habang pe tungko dihabangkon halisungsung manang aek magodang, mago manang busuk, alai ianggo tano ndang habang, hot do tano dohot harajaon Negeri Pusuk di ingananna, tano  hak adat, pusako sian Ompunta Datu Parulas Parultop (DPP) tu  anak na tolu: Raja Pusuk-Buaton-Mahulae (PBM). Ido patik jala uhum  na so jadi mose hombar tu adat-istiadat, nataradat dohot naniadathon na pinungka ni Ompunta si jolo-jolo tubu na hot togu jala na ingkon sihajongjongkonontonta  di tano Negeri Pusuk dohot na humaliangna. Songon nidok ni torsa Batak, “Hak ripe-ripe i ndang tarbahen jadi pangompolan, hak pangompolan i ndang tarbahen jadi ripe-ripe!”

4.     Ruhut-ruhut ni Parhutaon dohot Mamungka Huta

Molo mamungka huta ingkon jamot diangka adat dohot uhum, ingkon adong parripe jala adong namora huta, cukup dibilangan ripe na mangulahon ulaon adat, ipe asa dirungguhon di jolo ni raja huta na mangalehon tano i, raja ni boru, raja ni hula-hula, raja ni dongan sabutuha, raja bius, jala ingkon ditolopi raja panggomgom (Raja-raja Pusuk-Buaton-Mahulae) Negeri Pusuk, na jongjong di pansa na hundul digadu, na tangkas umboto sejarah ni tano  pusaka i, asa unang adong mandaho angat dohot late ni roha; sitiop gantang tarajuan, hatian na so ra monggal; sihorus na gurgur, sitambai na longa; sijaga pintu jae dohot pintu julu si Tombang tano si Suan bulu. Asa songon hata ni natua-tua, Na marpusuk ni lenteng, marbunga ni rintua; na marhaha maranggi, mardongan sabutuha ingkon sahata sapandohan na laho mangula siulaon nang na mangalean huta manang parhutaan pe. Dungi molo nunga dapot sada rim ni tahi jala ditolopi luhut raja-raja, ingkon denggan ma antong huta i diadathon mangihuthon adat itiadat ndang holan gabe tano pandege-degean.

Luhut huta na so diadathon nang huta na tarulang naung ditinggalhon pangisina, ndang hot be i goaron huta, alana i  ingkon mulak hak ni tano i tu bona na ima tu Sitombamg tano huhut  Sisuan Bulu di Negeri Pusuk dohot na humaliangna: Datu Parulas Parultop na diwarishon tu anak na natolo Raja Pusuk, Buaton, Mahulae (PBM) mangihuthon partonding uluan  ni huta panjaean na pinasahat tu nasida be parompu-ompu na ditorushon tu angka pinomparna be. Ingkon ingot hita dipoda jala benget di tona, "Tuko na so jadi butbuton, gadu na so jadi sesaon”. Ido patik na so jadi mose, uhum na so jadi muba.

5.     Manat Unang Tarsuga, Sisip Unang Tarrobung

Habang sitapi-tapi, songgop siruba-ruba; patik na so jadi mose, uhum na sojadi muba. Togu ninna urat ni bulu, toguan do urat ni padang; Togu pe nidok ni uhum, toguan do nidok ni padan. Manat hita unang tarsuga, sisip unang tarrobung mandalanton turpuk hangoluon, harajaon nang paradaton di Negeri Pusuk.

6.     Masiamin-aminan songon lampak ni gaol, masitungkol-tungkolan songon suhat dirubean

Tuat pandurung nangkok pandoran, tampak ma hita hundul, marsada roha sapandohan, gok pasu-pasu na sumurung, jumpang sangap nang pansamotan, marsada roha hita masihaholongan. Ingkon tanda ma hita na marsabutuha Pusuk-Buaton-Mahulae sisada hata sisada ulaon sisada anak dohot boru.  Masiamin-aminan songon lampak ni gaol,  masitungkol-tungkolan songon suhat dirubean ai ido asal mula ni hagabeon, hasanganpon nang hamoraon. Marimbangkon dohot angka donganta hombar balok, tung dao dope hita hatinggalan dimajuon dohot hapistaron. Alani i ingkon marsada ni roha hita masiurupan na mardongan sabutuha khususna ma i Pusuk-Buaton-Mahulae na tinggal di Bona ni Pasogit nang angka na di luat sileban na laho pamajuhon jala patimbulhon goar ni Ompunta Pusuk-Buaton-Mahulae (PBM).

7.     Somba marhula-hula, manat mardongan tubu jala elek marboru

Molo naeng hita gabe, ingkon somba jala hormat ma hita antong marhula-hula. Ai sian Hula-hula i do asal ni hagabeon dohot hatuaaon, horong pambuatan ni boru di hita.

Molo naeng hita sangap, manat ma hita mardongan tubu, mardongan sabutuha. Sangap tu angka ginjang ni tutur. Unang tabahen hundulanta tumimbo sian ama manang hahanta nang pe tumimbo pangkat manang hamoraonta! Unang pajolo-jolohon hita manjalo jambar manang mandok hata molo disi dope natua-tua manang ginjang ni tuturta, ingkon pantun martutur hata jala marpangalaho. Ido mambahen sangap ditonga-tonga ni dongan sabutuha, dijolo ni dongan, loloan natorop nang masyarakat pe.

Molo naeng hita mamora, turut jala elek ma hita antong marboru. Unang tabahen angka borunta dohot helanta i songon dakdak sisuru-suruon.  Elek tapangido pangurupion nasida. Taingot ma hata ni bungku i: “Hai hamu angka natua-tua, unang digintali hamu ianakkonmana i!”

Molo taradoti jala tapardagingkon poda “dalihan na tolu” na uli na denggan i di ngolunta, gok ma tua hagabeon, hasangapon nang hamoraon jaloonta di portibi on.